भुदरगड तालुक्यातील आदमापूर येथील मरगूबाई मंदिराशी सदगूरु बाळूमामांचे अतूट व अद्वैत नाते होते. बाळूमामांनी आपल्या अवतारी जीवनातील अखेरचा काळ याच मंदिरात व्यतीत केला आणि वयाच्या ७४ व्या वर्षी ४ सप्टेंबर १९६६ रोजी याच पवित्र मरगूबाई मंदिरात महासमाधी घेतली व जो मी हाय म्हणल त्याला मी हाय अन नाही म्हणल त्याला नाही. असा इशारा देत बाळू धनगर मेला म्हनशीला तर चुकशीला असे सांगत मरगूबाईला माझी बकरी व चाकर यांना सांभाळून घे अशी विनंती केली ती याच पवित्र जागेतून त्यामुळे या स्थानाला महाराष्ट्रासह देशभरातील लाखो भाविकांच्या दृष्टीने अनन्यसाधारण धार्मिक, आध्यात्मिक व ऐतिहासिक महत्त्व प्राप्त झाले आहे.
सुरुवातीला छोटेखानी असलेल्या या मंदिराचा विस्तार श्री. विजयराव गुरव यांनी गेल्या वीस वर्षांपासून ग्रामपंचायतीकडून आवश्यक सुविधा नसतानाही स्वतःच्या प्रयत्नांतून, स्वतःच्या नावाने वीज जोडणी घेऊन प्रकाशाची सोय करून आणि विविध विकासकामे राबवून केला आहे. आज या ठिकाणी फाउंडेशनच्या वतीने वार्षिक भंडारा, भव्य यात्रा सोहळा, मोफत अन्नछत्र आणि समाधी दिनानिमित्त कण्याताक हा अमृत प्रसाद असे अखंड उपक्रम अविरत सुरू आहेत. यामुळे या मंदिराकडे भक्तांचा ओघ वाढत आहे.